அவனும் அவளும் 4

அவள் :  இன்று உனக்கு 

ஒரு Test. சங்க பாடல்களில் 

செம்மண்ணோடு 

சேர்ந்த நீர் என்கிற உவமை 

மிக பிரபலம் ! 

அதை ஒரு ஏழை பெண் 

ஒருத்தியிடம் அவன் 

கணவன் எப்படி சொல்வான் ?

அவன் : ..........

நான் பாலில் 

நழுவி விழுந்த

பழம் அல்ல

நினைத்தால்

பிரிந்து போவதற்கு ! 

உன்னோடு 

திடமாய் சாயம்

ஏறிய தேநீர் ..!

அவள் : அடப்பாவி கொலை

பண்ணிட்ட எழுதுனவரு இப்ப

இருந்தா உன்ன

கொலை பண்ணிடுவாரு !

சரி ! ஒரு தலை காதலன் 

எப்படி சொல்லி இருப்பான்?

அவன் :  ஊ .ம்

உன் வெட்கத்தின் 

நிழலில் உலர்ந்த

மருதாணி கழுவப்பட்ட 

குவளை நீராய் என்

காதல் நெஞ்சம் !

அந்த மகிழ்ச்சியை 

அரை நாழி விட்டாயா?

வெயில் தெறிக்கும்

உன் கொல்லைபுறத்தில்

கொட்டிவிட்டாயே !

அவள் : இன்னும் சற்று நேரத்தில் 

காதலில் விழப் போகிறவர்களுக்கு

விழுந்து கொண்டு இருப்பவர்களுக்கு

எப்படி சொல்வாய் ? 

அவன் : (விட மாட்டாயோ )

நல்ல கணவன் வேண்டி 

அரச மரத்தடி பிள்ளையார் 

முன் நீ நின்றிருக்க - உன் 

நெற்றி குங்குமத்திற்காக 

இதுவரையில் - இலையின்

நுனியில் தொங்கி கிடந்த

ஒற்றை துளியாய் என் நெஞ்சம் !

என் காதல் துளி விழுந்ததும் 

துடைத்து விட்டு போவதும்

மீண்டும் குங்குமம் எடுத்து 

கலந்து கொள்வதும் - உன் 

கையில்தான் என் கண்ணே !

அவள் : கொஞ்சம் பெருசா இருக்கு !
இருதாலும் நல்ல கற்பனை !

இப்ப , முதல் காதல் பிரிந்து

மறு காதல் செய்பவர்களுக்கு ?

கொஞ்சம் கிராமிய நடையில் ...

அவன்: (சிக்கலான தலைப்பு !)

சனி மூலை கருக்கையில

மாரியாய் அந்த மவ

பிச்சு கிட்டு இறங்குவான்னு

பக்குவமா ஏ நிலத்த

கொத்தி வச்சேன் - தண்ணி

இரைச்சி உழுதும் வச்சேன் !

பொறுக்காத பெருங்காத்து

அவள வெறு பக்கம்

இழுத்து போச்சு !

சோறு  தண்ணி இல்லாம

"நா" வறண்டு கிடக்கையில

அழுது புரண்டு விட்ட கண்ணீரு
 சேறு குழச்ச சேதியெல்லாம்

 ஊர் கூடி சிரிக்க போகும் வேளையில

அடை மழையாய் வந்தவளே !
நெஞ்சை பிளந்துகிட்டு 
ஓடும் குருதிக்குள்ள 
கலந்தவளே ! - என்னை 
மறு முறை பெத்தவளே !

அவள் : யப்பா ! முடிச்சுட்டியா ?
போதும் தலைவா ! 
(அவனது ஒவ்வொரு பதிலுக்கும் 
 சரி வர புகழாத அவள் - அதை 
 ஆனந்தமாய் திரட்டி கண்களால் 
 அவளுக்கே தெரியாமல் அள்ளி 
 வீசி கொண்டிருந்தாள் . . !
 அந்த அர்ச்சனையில் அவனும் 
 ஆசீர்வதிக்க பட்டான் ..!)